Sumqayıtlı namizəd, yazıçı Günel Eyvazlı media provokasiyasına narazılığını bildirdi

Bu gün Lent.az saytında “Günel Eyvazlının namizədliyini geri götürməsi üçün danışıqlar aparılır” kimi xəbər gedib.

Bitərəf namizəd yazıçı Günel Eyvazlı birlik.az saytına açıqlaması zamanı söyləyib ki, “mən elə seçki marafonuna start verildiyi gündən öz təşəbbüsüm ilə namizədliyimi irəli sürmüşəm. İllərdir cəmiyyət arasında olan ictimai mövqeyimə, yazıçılıq statusuma, bilgi və savadıma arxalanaraq, ən əsası isə Respublika Prezidentinin gənclərə çağırışını rəhbər tutaraq bu yola addım atdım.

Bu cəfəng xəbərin nəyə xidmət etdiyini anlamıram. Mənə Lent.az saytı açıqlama versin ki, o, hansı mənbəyə, kimə əsaslanaraq bu xəbəri yayımlayıb? Bu dezinformasiyanı dövriyyəyə buraxmaqda məqsədi nədir? O nə deməkdir, danışıqlar gedir? Mənə cavab versinlər.

Biz müstəqil dövlətdə yaşayırıq, bizi qanunlar idarə edir. Yalnız qanunlara barmaqarası baxanlar, dövlət başçısının çağırışını vecə almayanlar “ərizəni götür” deyə bilər və bu haqda yalan informasiya yaya bilər.

Üstəgəl cəmiyyət arasında filənkəs tapşırılıb, onsuz da filan adam üçün yollar təmizlənir kimi cəfəng fikirlər də dolaşmaqdadır. Mən isə seçkilərin ədalətli və şəffaf keçəcəyinə inanıram.

Mən bu dövlətin vətəndaşıyam, partiyalı, ya partiyasız bu dövlətin vətəndaşı bərabərhüquqludur. Heç kim heç kimin haqqına girə bilməz!

Bir daha təkrar edirəm, mən Prezidentimizin gerçəkləşdirdiyi islahat prosesinə qoşulanlardan biri olmaq istəyirəm. Vicdanla, şərəflə Dövlətimə, Xalqıma, vətənimə xidmət etmək istəyirəm.

Seçicilərimin də məni qalib edəcəyinə çox inanıram. Hər görüşdə, sakinlərin mənə qarşı olan münasibətində bunu çox yaxşı hiss edirəm. Görüşlərimiz, təbliğat-təşviqat kompaniyamız uğurla davam edir. Mən qalib gələcəyəm!

Qeyd: Yazıçı, namizəd Günel Eyvazlının şikayət etdiyi məqalənin linki :

https://lent.az/news/338265?fbclid=IwAR2DSOO1QM8VlQpShgTZSgddFjm9M3CGWegp2obx2MKidmLKmvYLBmIW-Jw