Deputatlığa namizədə görə icra nümayəndəsi işdən çıxarıldı

Qazax rayonunun Ağköynək kənd icra nümayəndəsi Aydın Hacıyev deputatlığa namizəd Ülviyyə Ağayevaya görə işdən çıxarılıb. Bu barədə Ağköynək kəndinin sakinləri məlumat verib.
Məlumatda deyilir ki, özünü buraxan deputatlardan Ülviyyə Ağayeva yanvarın 18-də Ağköynək kəndində görüş keçirməyə çalışıb. Kənd sakinləri Ülviyyə Ağayevadan niyə ötən 5 ildə bir dəfə də olsun kəndə gəlmədiyini və seçicilərlə görüşmədiyini soruşublar. Deputat xanım seçicilərin bu sualına cavab verə bilməyib. Kənd sakinləri onun çıxıb getməsini istəyiblər və belə bir adama səs verməyəcəklərini deyiblər.
Bu xəbər Qazax rayon icra hakimiyyətinə çatan kimi icra nümayəndəsi Aydın hacıyevi qəbula çağırıblar və baş vermiş hadisəyə görə Ülviyyə Ağayevadan üzr istəməsini və yenidən görüş təşkil etməsini tələb ediblər. Əks halda işdən çıxarılacağı deyilib. İcra nümayəndəsi kənd sakinlərini razı sala bilməyəcəyini deyərək, üzr istəməkdən imtina edib. Buna görə də onun işdən azad olunması ilə bağlı ərizəsini alıblar.
Bununla bağlı fikirlərini açıqlayan 106 saylı Tovuz-Qazax-Ağstafa seçki dairəsindən deputatlığa namizəd Mütəllim Rəhimov deyib ki, bu ciddi faktdır. Məsələ araşdırılmalıdır, əgər təsdiqini taparsa MSK təcili tədbir görməlidir. İcra hakimiyyətinin seçkilərə müdaxiləsi yolverilməzdir və hər hansı bir namizədin xeyirinə təbliğat kampaniyasında iştirak etməməlidir.
Əks tərəfin də mövqeyini verməyə hazırıq.