Təkamül Partiyası 25 dairədə namizəd irəli sürəcək

Bu gün Azərbaycan Təkamül Partiyasının sədri Teyyub Qənioğlunun sədrliyi ilə Mərkəzi Şuranın Siyasi Bürosunun növbəti yığıncağı keçirilib.

T.Qənioğlu Milli Məclisə növbədənkənar seçkilərlə əlaqədar ölkədə yaranmış vəziyyətlə bağlı geniş məlumat verib. O, növbədənkənar seçkilərin keçirilməsini zəruri edən səbəblərə aydınlıq gətirərək Təkamül Partiyasının bu seçkilərdə iştirak edəcəyini bir daha vürğulayıb.

Müzakirələr zamanı partiyanın ilkin olaraq 25 dairədə namizədlərinin irəli sürülməsi barədə qərar qəbul edilib və namizədlərin siyahısı müəyyən edilib. Bir daha qeyd edilib ki, ATP seçkilərdə həm müstəqil, həm də digər partiyalarla blok şəklində iştirak edə bilər. Digər partiyalarla aparılan danışıqların bir həftə ərzində yekunlaşdırılması qərara alınıb. Danışıqların nəticəsindən asılı olaraq ATP-nin seçkilərdə hansı formada iştirak etməsi, hansı dairələrdə namizədlərinin irəli sürülməsi ilə bağlı son qərarın Mərkəzi Şuranın növbəti iclasında verilməsi qərara alınıb.