MMP-də toplantı keçirildi – Partiya sədrinə səlahiyyət verildi

Bu gün Müasir Müsavat Partiyasının mərkəzi qərargahında növbəti toplantı keçirilib.

Partiyanın mətbuat xidmətindən GÜNpress.az-a daxil olan məlumata görə, toplantıda MMP Bakı şəhər rayon təşkilatlarının rəhbərləri, İdarə Hüyətinin üzvləri, Qadınlar və Gənclər təşkilatlarının rəhbər şəxləri iştirak ediblər. İclasda ölkədəki ictimai-siyasi vəziyyət, Qarabağda erməni separatçılarının fəallaşması və digər məsələlər müzakirə olunub.

Partiya sədri Hafiz Hacıyev bir sıra partiya sədrləri ilə son günlər apardığı görüşlərin nəticələri barədə İdarə Heyətinin üzvlərini məlumatlandırıb. İdarə Heyəti sədr Hafiz Hacıyevə gələcəkdə Qarabağla bağlı ölkədə yaradılacaq koalisiyada səlahiyyətli şəxs kimi çıxış etməsi imkanı verilib. Partiya sədri çıxışında qeyd edib ki, ermənilər artıq çox azğınlaşıblar. Onun sözlərinə görə, bu səbəbdən də Azərbaycanda ictimai-siyasi qüvvələr bu məsələdə səfərbər olmalıdırlar.
İdarə Heyəti bu məsələdə ortaya prinsipial mövqe qoymağı partiya sədrinə həvalə edib.

Bundan əlavə, yaxın günlərdə Siyasi Şuranın iclasının keçirilməsi ilə bağlı qərar qəbul olunub.