"Bu cür təhlükəli insanları yaxına buraxmaq olmaz" - Partiya sədri

“İndi onun nəyini bağışlamaq olar? Mən düşünürəm ki, bu cür təhlükəli insanları yaxına buraxmaq olmaz”

Bunu Moderator.az-a açıqlamasında Müasir Müsavat Partiyasının sədri Hafiz Hacıyev Meydan TV-nin keçmiş rəhbəri Emin Millinin prezident İlham Əliyevdən üzr istəməsi və ölkəyə qayıtmaq istəməsi haqda danışarkən deyib. H.Hacıyev bildirib ki, E.Milli bu cür manevrlərlə bizləri aldada bilər:


“Emin Milli kimilər gördü ki, onların başçıları elə Azərbaycanda satqınlıqla məşğuldur və onların adından istifadə edib Əli Kərimli və Cəmil Həsənli alver edir. Ona görə də səhvlərini gec-tez başa düşüb üzr istədi. Amma mənə elə gəlir bu günə qədər onların beynəlxalq aləmdə Azərbaycanın imicinə vurduğu zərbə heç bir şeylə əvəz edilən deyil. Bunların hamısını nəzərə alsaq görərik ki, ola bilər ki, aldadıcı manevrlər edib məlumat toplayırlar. Yəni bunlara etibar yoxdu, onlar hər şeyi pulda görürlər. Emi Milli Azərbaycan dövləti və başçısı haqqında nələr deməyib. İndi onun nəyini bağışlamaq olar? Mən düşünürəm ki, bu cür təhlükəli insanları yaxına buraxmaq olmaz. İnsan sifətini bir dəfə göstərir və xəyanət edir. Xəyanət edən insanları bağışlamaq isə günahdır.

Tarix göstərib ki, bu cür insanlar islah olunmurlar. Bunların da hər halda müəllimləri, dirijorları var. Özünüz bilirsiniz ki, Emin Milli Cəmil Həsənlinin ən çox sevdiyi insandır. Əli Kərimlinin qəhrəman etdiyi Emin Milli bu gün nəyə görə üzr istəyir? Onda o, getsin dünya dövlətlərinə müraciət edib desin ki, bu günə qədər İlham Əliyev haqda dediklərim yalnış olub, məni öyrədiblər. Bununla yanaşı, onu kim öyrədibsə, onların da adlarını desin və bundan sonra onu bağışlamaq haqda düşünmək olar. Bu gün Azərbaycanın üzərində böyük oyunlar qurublar və burda özümüzünkülərdən istifadə edirlər. Ölkə başçımız Bürüsseldə olarkən onların orda xoşagəlməz şüarlar səsləndirmələri heç vaxt yaddan çıxmayacaq. Bunlar heç vaxt Qarabağ haqqında bir dəfə danışmayıblar. Tapşırıq o olub ki, ölkə başçısının imicinə zərbə vuran yalançı ifadələrlə milləti çaşdırsınlar. Bu baxımdan düşünürəm ki, E.Millinin açıqlaması təsadüfi deyil və onun göz yaşlarına inanmaq olmaz. Belə çıxır ki, onda sabah Sevinc Osmanqızı və digərləri də deyəcək ki, məni bağışlayın ölkəyə qayıdım. Bu düzgün yanaşma deyil. Hər halda ehtiyatlı olmaz lazımdır”.