"Rasim Musabəyov kimlər tərəfindən seçilibsə..." - Partiya sədri

Deputat Rasim Musabəyovun sosial şəbəkədə “popkorn” satan uşaqla bağlı paylaşımı birmənalı qarşılanmayıb.

Deputat məmurlara səslənərək azyaşlının bakılıları zəhərlədiyini, “popkorn” satmaqla qonaqlar qarşısında utandırdığını deyib. Musabəyov uşaqla bağlı ölçü götürülməsini istəyib. Deputat bildirib ki, onlar icazəsiz işləyirlər, dövlətin elektrik enerjisindən pulsuz istifadə edirlər, vergi vermirlər.

Məsələ ilə bağlı yenicag-a açıqlama verən Müasir Müsavat Partiyasının sədri Hafiz Hacıyev hesab edir ki, deputat daha ciddi məsələlərlə məşğul olmalıdır:

“Bəzi məmurlar, deputatlar ölkə başçısı tərəfindən xalqa yönələn müsbət addımları qaralamaqdan ötrü sanki komanda şəklində çalışırlar. Vəziyyət çox gərgindir. Rasim Musabəyov hörmətim olan şəxsdir. İstərdim ki, daha çox Dağlıq Qarabağ məsələsi ilə bağlı çıxış etsin. Bir uşağın nəsə satmasını qabartmağın elə də bir əhəmiyyəti yoxdur. Prezident deyir ki, hamı dolansın. Bunlar xalqı qıcıqlandıran addımlardır. Əgər bu məsələlər davam etsə, məcburam ki, qardaşıma məlumatları çatdıram. Görürəm ki, ayrı yolu yoxdur. Qoymurlar millət evinə çörək aparsın, dolansın. Rasim Musabəyovun parlamentdə səssizliyi ilə yadda qalmasına bir söz deyə bilmərəm. Hər halda kim olduğu hamıya bəllidir. Kimlər tərəfindən seçilibsə, bu da onun öz işidir. İstərdim ki, atdıqları addımlarla prezidentə kömək olsunlar”.