Əli İnsanov müxalifət liderinə çevrilə biləcəkmi? – Şərh

Əli İnsanovun hansı addımlar atacağı ilə bağlı politoloq Qabil Hüseynli danışıb. Qabil Hüseynli bildirib ki, Əli İnsanov hələ tələsməməlidir:

"Düzdür, həbsxanadan cəmiyyətdə baş verən prosesləri izləmək mümkündür, ancaq cəmiyyətin içərisində olmaq tamam fərqlidir. Doğrudur, Əli İnsanov siyasətdə olacağını söyləsə də, atacağı addımlardan sonra dəqiq fikir söyləmək olar. Əli İnsanov real proseslərin fərqinə varmalıdır, baş verənləri dərindən öyrənməlidir. Əli İnsanov Qərbi Azərbaycan elektoral bazası ilə işləməyə üstünlük verəcək. Bu məsələləri öyrənmək üçün, prosesləri başlatmaq üçün ona xeyli vaxt lazımdır. Əli İnsanovun siyasi təşkilat yaratmaq istəyi olacaqsa, bu xeyli zaman alacaq. Ümumiyyətlə, Əli İnsanovla bağlı fikir söyləməkdə tələsməməyin tərəfdarıyam”.

Əli İnsanovun hansısa siyasi təşkilatlara qoşulmasına gəldikdə isə, politoloq bildirib ki, bu, real görünmür: "O özü əgər siyasətlə məşğul olmaq istəyirsə, bir mərkəzə çevrilməlidir ki, onu siyasi mühitdə qəbul edə bilsinlər. Tək başına onun nüfuzu, hörməti ola bilər, ancaq təkbaşına iş görmək mümkün deyil”.

Qeyd edək ki, Ə.İnsanov 2005-ci ilin oktyabr ayında həbs edilib. O, dövlət vəsaitlərinin mənimsənilməsində və dövlət aktivlərinin qanunsuz özəlləşdirilməsinin təşkilində ittiham olunub.

2007-ci ilin aprel ayında Əli İnsanov Bakı Ağır Cinayətlər Məhkəməsinin hökmü ilə əmlakı müsadirə olunmaqla və 3 il ərzində dövlət vəzifəsi tutması qadağan edilməklə 11 il müddətinə azadlıqdan məhrum olunub.

Yenicag.az