Daha 3 jurnalistin ölkədən çıxışına qadağa götürüldü - ADLAR

"Meydan TV" cinayət işi ilə bağlı daha 3 jurnalistin ölkədən çıxışına qoyulan qadağa götürülüb.

GÜNpress.az ona-ya istinadən bildirir ki, qadağası ləğv olunanlardan biri, jurnalist Aytac Əhmədovanın sözlərinə görə, mayın 7-də onların ölkəni tərk etmək qadağası götürülüb.

Bu barədə onlara Baş Prokurorluğun Ağır Cinayətlərə dair İstintaq İdarəsinin rəisi Eldar Əhmədov məlumat verib.

Aytac Əhmədova ilə yanaşı, Tural Əsədi və Aytən Fərhadovanın da sərhəd qadağası ləğv edilib. A.Əhmədova əlavə edib ki, bu qadağa onlara 2015-ci ildə “Meydan TV” ilə başlanmış cinayət işində şahid qismində dindirildiklərinə görə tətbiq edilib. O qadağanın götürülməsinə görə çox şad olduğunu, amma ölkədən getmək fikrində olmadığını bildirib.

Bundan əvvəl jurnalistlər Aynur Elgünəş, İzolda Ağayeva, Natiq Cavadlı, Səlimə Cəlilova və yazıçı Rasim Qaracanın ölkədən çıxışına qoyulan qadağa götürülüb.