Cahangir Əsgərovun qalereyaçı qızı – Fotolar

Ötən həftə “Azal”ın prezidenti Cahangir Əsgərovun Gazelli Azerbaijan kosmetika şirkətinin təsisçisi və kreativ direktoru olan qızı Cəmilə Əsgərova ilə bağlı məlumat vermişdik. “Qafqazinfo”ya “Gazelli Art House” incəsənət qalereyasının təsisçisi olan azərbaycanlı məmurun digər qızı ilə bağlı maraqlı məlumat daxil olub.

Məlumata görə, Cahangir Əsgərovun qızı Mila Əsgərova Londonda tanınmış incəsənət mütəxəssislərindən biri, “Gazelli Art House” incəsənət qalereyasının təsisçisi və rəhbəridir. Azərbaycanda doğulsa da, o, təhsilini Londonun İqtisadiyyat və Siyasi elmlər məktəbində alıb. Mila dünyaca məşhur Sotheby’s hərrac evində Müştərilərlə iş və PR sahələri üzrə təhsilini mükəmməlləşdirib. O, həmçinin İngiltərənin nüfuzlu Central St. Martins universitetində təhsil alıb və Christie’s hərrac evində təcrübə keçib.


Qazandığı bütün təcrübələr Milaya “Gazelli Art House” müasir incəsənət məkanını yaratmaqda kömək olub. Qeyri-kommersiya təşkilatı təkcə xarici deyil, azərbaycanlı rəssamların da fəaliyyətini dəstəkləyir. Mila Əsgərovanın adı dəfələrlə Mərkəzi Asiya və Qafqaz regionunun incəsənət sahəsi üzrə ən nüfuzlu qadınlarının siyahısına daxil olub.


Qeyd edək ki, 2003-cü ildən “Gazelli” kosmetika şirkətinin strukturuna daxil olan “Gazelli Art House” 2010-cu ildən öz fəaliyətinə London şəhərində, 2012-cı ildən isə Bakıda başlayıb. Mila Əsgərovanın fikrincə, qalereyanın əsas fəaliyyətinin incəsənətdə baş verən hadisələri izləmək, maraqlı və vacib hadisələrə diqqəti cəlb etmək, onları təhlil etmək və yeni fikirlərin yaranması üçün stimul yaratmaqdır. “Gazelli Art House” müasir dünya incəsənətinin keçmiş və indiki vəziyyəti, daha çox necə ola biləcəyi ilə maraqlananlar üçün yaradılıb.