"Azərbaycanda on minlərlə insan işsiz qala bilər..." (EKSPERT)

"Azərbaycanda xeyli turizm şirkəti bağlana, on minlərlə insan işsiz qala bilər".

Bunu Qaynarinfo-ya açıqlamasında iqtisadçı-ekspert Natiq Cəfərli deyib. Novruz bayramını turizm sektoru üçün itirilmiş hesab etdiyini söyləyən ekspert turizm sektorunu ayaqda saxlamaq üçün ciddi təşviq proqramlarına ehtiyac olduğunu bildirib:

"İran bazarından gözümüzü çəkməliyik. Məndə olan məlumatlara görə 90 faiz İran vətəndaşının rezervasiyası ləğv edilib. Hər il Novruz bayramı ərəfəsində təqribən 30-35 min iranlı ölkəmizə gəlirdi ki, bu da turizm bazarına ciddi təsir göstərir və canlanmaya səbəb olurdu. İndiki vəziyyətdə İrandan gələn turistlərin sayındakı kəskin azalma fonunda Novruz bayramını turizm sektoru üçün itirilmiş hesab etmək olar. Söhbət tək İrandan da getmir. Ümumiyyətlə, dünyada turizm 35 faiz azalıb. Bu, çox ciddi rəqəmdir. Hətta virus təhlükəsi artdıqca qlobal turizm gəlirlərinin yarıbayarı azalması ehtimalı da var. Aviaşirkətlər, turizm şirkətləri artıq müflis olduqlarını elan etməyə başlayıblar. Turizm şirkətlərinin ayaqda qalması üçün müəyyən təşviq proqramlarının həyata keçirilməsinə ehtiyac var. Hökumət ilin sonuna qədər onları bütün növ vergilərdən azad etsə, ən azından onların ayaqda durmasına kömək etmiş olar. Əks halda Azərbaycanda da çox sayda turizm şirkəti bağlanmalı olacaq. Bu sahədə 26 minə yaxın insan çalışır. Belə olacağı təqdirdə on minlərlə insanın işsiz qala bilər".