Baş Prokurorluq seçki məntəqəsindəki ölüm hadisəsi ilə bağlı məlumat yayıb

101 saylı Göygöl-Daşkəsən Seçki Dairəsinin Mollacəlilli kəndində olan məntəqəsində ölüm faktı qeydə alınıb.

Məntəqədə müşahidəçi olan Gəncə şəhər sakini, 1954-cü il təvəllüdlü Sübhan Hacıyev infarkt keçirib. Nəticədə S. Hacıyev məntəqədə ürəktutmasından dünyasını dəyişib.

Baş Prokurorluq 101 saylı Göygöl-Daşkəsən Seçki Dairəsindən deputatlığa namizədliyi qeydə alınmış Möhsüm Aslanovun vəkili, 1954-cü il təvəllüdlü Sübhan Hacıyevun həmin dairənin Göygöl rayonunun Mollacəlilli kəndində yerləşən 38 saylı seçki məntəqəsində 15-ə yaxın müşahidəçi və digər şəxslərin gözü qarşısında qəflətən vəfat etməsi ilə bağlı məlumat yayıb.

Baş Prokurorluğun Mətbuat xidməti bildirir ki, daxil olan məlumat əsasında dərhal hadisə yeri və meyitə prokurorluq və polis əməkdaşları tərəfindən məhkəmə-tibbi ekspetinin iştirakı ilə baxış keçirilib.

Sübhan Hacıyevin meyitinin müayinəsi zamanı bədəni üzərində hər hansı xəsarət və ya xəsarət izi aşkar olunmayıb.

İlkin araşdırma zamanı müəyyən edilib ki, seçki qanunvericiliyinin tələblərinin pozulması ilə əlaqədar həmin seçki məntəqəsindən Dairə Seçki Komissiyasına hər hansı müraciət daxil olmayıb, eləcə də münaqişə və sair qanunsuzluqlar qeydə alınmayıb.

Sübhan Hacıyev uzun müddət ürək xəstəliyindən əziyyət çəkirmiş, xəstəliyi ilə əlaqədar 2 dəfə infarkt keçirib və təxminən 6 ay bundan əvvəl koronaroqrafiya (anju) əməliyyatı olunub.

Faktla bağlı Göygöl Rayon Prokurorluğunda araşdırmalar davam etdirilir.