Hafiz Hacıyev aksiyalara start verir

Müasir Müsavat Partiyası öz valideyinlərinin qəbrini ziyarət etməyə gedərkən ermənilər tərəfindən girov götürülən Dilqəm Əsgərov və Şahbaz Quliyevin azad olunması ilə bağlı aksiyalar keçirəcək.

Bu barədə partiya sədri Hafiz Hacıyev Aktual.az-a açıqlamasında deyib.

O qeyd edib ki, aksiyalara fevral ayında start veriləcək: "Qərb və Avropa dövlətlərinin diplomatik nümayəndəliklərinin rəhbərləri ilə görüşlərimizdə girovlarımızın qondarma rejim tərəfindən mühakimə edilərək həbsə atıldığını onların diqqətinə çatdırmışıq. Əgər həmin ökələr insan hüquq və azadlıqlarına hörmətlə yanaşırlarsa, girovlarımızın azad olunması üçün tədbirlər görsünlər. Yox, əgər həmin beynəlxalq qurumlar onların diktəsi ilə işləyən insanları müdafiə edirlərsə, bu, artıq başqa məsələ. Belə olan halda onların insan hüquq və azadlaıqlarından danışmağa ixtiyarları yoxdur.

Avropa və Qərb dövlətləri Azərbaycana qarşı ikili standartları özlərinə strategiya seçiblər. Buna görə də girovlarımızın azad olunmasına laqeyd yanaşırlar. Partiya olaraq bu məsələni diqqətdə saxlayırıq. Fevral ayında Azərbaycandakı xarici qurumların nümayəndəliklərinin ofislərinin, səfirliklərin qarşıısında aksiyalar keçirəcəyik. Aksiyaların tarixi və zamanı ilə bağlı mediaya açıqlama veriləcək. Məqsədimiz həmin qurumları beynəlxalq hüququn prinsiplərinə hörmətlə yanaşmağa çağırmaqdır".

Qeyd edək ki, 2014-cu ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə yaxınlarının qəbrini ziyarət edərkən Ermənistan Silahlı Qüvvələri tərəfindən girov götürülüb, digər Azərbaycan vətəndaşı Həsən Həsənov isə öldürülüb.