Hafiz Hacıyev: "Bəzi qüvvələr dünyanı qarışdırmaq istəyir və bu qarışıqlıqdan fayda əldə etmək istəyir"

Son zamanlar ABŞ-da qaradərili insanlar ilə polis arasında müharibə gedir. İğtişaşlar Maykl Braun adlı qaradərili gəncin ağdərili polis tərəfindən öldürüldüyü 6 avqust tarixindən bəri davam edir. Qarşıdurmalar, əsasən, qaradərililərin məskunlaşdığı Sent-Lüis raoynunda baş verir. Burada təhlükəsizlik qüvvələri, əsasən, ağdərili polislər tərəfindən qorunur. Missuri ştatının Ferqüson şəhərində baş verən son qətl hadisəsi aranı daha da gərginləşdirib. Bu dəfə 23 yaşlı qaradərili gənc bıçaqla polisə hücum edərkən öldürülüb. Bəzi siyasətçilər bildirirlər ki, ortada Rusiyanın əli var. Bir qisim isə bu hadisələri illərdir baş verən, qara və ağdərili insanlar arasında baş verən irqçiliklə əlaqələndirirlər.

LiderXeber.com informasiya agentliyi olaraq, məsələyə aydınlıq gətirmək üçün Muasir Musavat partiyasının sədri Hafiz Hacıyevə müraciət etdik. Hafiz müəllim isə açıqlamasında bunları dedi:

" Qəbul etmək lazımdır ki, ABŞ dünyanın 1 nömrəli lider dövlətidir. Günümüzdə dünyanın hər bir yerində baş verən hər bir hadisədə ABŞ-ın birbaşa əlaqəsi var. Təbii ki, bu dövlətə qarşı da dünyada mənfi və müsbət fikirlər var. Hal-hazırda Rusiya ilə mübarizəsinin nəticəsi göz qabağındadır. Amerikanı da qarışdırmaqda marağlı olan qüvvələr var.

Amerika tək millətdən ibarət bir dövlət deyil. Orada yüzlərlə millət var. Amerikanı parçalamağın ən asan yolu milliyətçiliyi artırmaqla qarışıqlıq salmaq və dövləti parçalamaqdır.

Müasir günümüzdə qloballaşan dünyada çox gərgin proseslərin şahidi oluruq. Amerikada baş verən bu hadisələrin yaxınlarda Avropada və dünyanın digər regionlarında da təsirini müşahidə edəcəyik. Bəzi qüvvələr dünyanı qarışdırmaq istəyir və bu qarışıqlıqdan fayda əldə etmək istəyir.

Azərbaycanda da bu yaranmış qarışıqlıqdan yararlanmaq istəyən (özlərini radikal müxalifət adlandıran) qüvvələr var və bunlar hər an qarışıqlığın yaranmasında maraqlıdırlar. Bir vətəndaş olaraq hər zaman Azırbaycanın bütövlüyü uğrunda mübarizə aparmalı, hər cür qarışıqlığın, qeyri-stabilliyin əleyhinə olmalıyıq. Müasir Musavat Partiyası milli müxalifət kimi bugünə qədər heç vaxt qarışıqlıq tərəfdarı olmayıb və bundan sonra da Azərbaycanı qarışdırmaq istəyən istənilən qurum və ya şəxslərə qarşı sərt addımlar atmağa davam edəcək".