Qubad İbadoğlu: “Müsavat bir nəfərin deyil”

Müsavat Partiyasının Divan üzvü, partiya başqanlığı uğrunda mübarizədə Arif Hacılıya uduzmuş Qubad İbadoğlu yenidən tərəfdarlarına səslənib

Q.İbadoğlu bu barədə öz facebook səhifəsində yazıb. Onun fikirlərini olduğu kimi təqdim edirik:

“Hörmətli müsavatçılar. Seçkidə mənə dəstək olan fədakar əqidədaşlarım. Eyni mübarizə yolunu seçmiş dəyərli bacı və qardaşlarım!

Müsavat nə bir qrupun, nə bir dövrün, nə də bir şəxsin partiyasıdır. Müsavat yarandıqdan bu günə kimi bütün yaxşı və pis zamanların, əqidəli və ləyaqətli millətsevər insanların partiyası olduğunu şərəfli tarixi ilə dəfələrlə sübut edib.

Odur ki, tarixin və ədalətin təcəssümündən, hazırda yaranmış vəziyyətdən çıxış edərək seçkidən sonra müsavatçı dostlarımızla - dəyərli ziyalılarımızla, mübariz gənclərimizlə keçirdiyimiz görüşlər, apardığımız fikir mübadilələri daha geniş formatda toplaşmağa ehtiyac olduğunu təsdiq etdi.

Müsavatın bu günü və gələcəyi ilə bağlı hər birinizin fikrini dinləmək, eyni zamanda sizinlə şəxsi mövqeyimi bölüşmək və beləliklə, kollektiv şəkildə qəbul olunmuş qərarlar əsasında növbəti addımlarımızı müəyyənləşdirmək məqsədi ilə hamınıza təkrarən səslənərək sizləri oktyabrin 6-da, saat 15-də Müsavat Partiyasının mərkəzi qərargahında təşkil onunacaq görüş-müzakirəyə dəvət edirəm.

Birlikdə verdiyimiz qərarlarla başlatdığımız bu mübarizəni sona, qələbəmizə qədər sizinlə birlikdə aparacağımıza əminliklə:

Sizin Qubad İbadoğlu".

Xatırladaq ki, sentyabrın 27-də partiyanın VIII qurultayında keçirilən başqan seçkilərində Arif Hacılı 228, Qubad İbadoğlu isə 200 səs toplayıb. Seçkinin nəticələri Müsavatda birmənalı qarşılanmayıb. Q.İbadoğlunun tərəfdarları A.Hacılını və komandasını seçkinin nəticələrini saxtalaşdırmaqda açıq və dolayısı ilə ittiham ediblər. Qarşılıqlı ittihamlar sosial şəbəkələrdə və mətbuat səhifələrində açıq-aşkar və bütün kəskinliyi ilə davam edib. A.Hacılını qardaşı Vaqif Hacıbəyli ilə Q.İbadoğlu arasında söz dueli də olub. Tərəflər bir-birini ağır ifadələrlə ittiham ediblər.

Müsavatın VIII qurultayının nəticələrindən narazı qalanlar elə həmin gün partiyanın parçalanacağına eyham vuran açıqlamalarla çıxış ediblər. Narazılardan biri Vurğun Əyyub Qubad İbadoğlu ilə təkbətək görüş keçirərək "ciddi müzakirələr apardıq, partiyanın gələcəyindən yana narahatlığımızı ifadə etdik" deməklə Müsavatda yeni proseslərin başlandığına işarə etdi. Q.İbadoğlunun indiki müraciətini də həmin prosesin tərkib hissəsi saaymaq olar.(virtulaz.org)