Başçının iş otağında icra nümayəndəsi öldü – ŞOK OLAY

Dünən səhər saatlarında Gədəbəy RİH başçısının iş otağında, adı çəkilən rayonun Qaradağ kəndi üzrə icra nümayəndəsi Cahangir Qasımov dünyasını dəyişir.

Düzdür, belə bir hadisənin başvermə səbəbi haqda ilk əvvəl müxtəlif mülahizələr irəli sürülsə də, tərəfimizdən apardığımız araşdırmalar zamanı bəlli oldu ki, adı çəkilən şəxsin ölümünə səbəb, məhz ondan 3 min manat pulun tələb olunması olur. Belə ki, əldə etdiyimiz məlumata görə RİH-nin başçısı İbrahim Mustafayev Qaradağ kəndi üzrə icra nümayəndəsi Cahangir Qasımovu daşıdığı vəzifəsindən uzaqlaşdırır. Belə olan halda o, dünən günün səhər saatlarında icra hakimiyyətinin binasına gedir və ilk əvvəl o, icra başçısının özü ilə gətirdiyi MKTB-nin rəisi Əkbər Kazımovla qarşılaşır. Həmin vaxt Əkbər Kazımov ondan RİH-nə gəlməsinin səbəbini soruşur. O halda Cahangir Qasımov cavab verir ki, “məni icra başçısı daşıdığım vəzifədən çıxarıb, elə bu səbəbdən də məsələni ayrıd etmək üçün gəlmişəm” deyir. Həmin vaxt Əkbər Kazımov ona “növbə indi mənimdir, sən gözlə. Mən içəri keçib sənin məsələni də icra başçısına deyə bilərəm” deyir və yarım saatdan sonra çölə çıxır. O halda o, Cahangir Qasımova bildirir ki, “icra başçısı 3 min manat “haqq-hesab” istəyir, sən həmin pulu ver və səhərdən də işinə çıx” deyir. Elə ki, icra başçısının otağına daxil olmaq üçün növbə Cahangir Qasımova çatır və o, otağa daxil olur, həmin an o, icra başçısına “məni hansı səbəbə işdən azad etmisiniz və 3 min manat pulu niyə verməliyəm” deyə ona sual edir. Çox keçmir ki, icra başçısının iş otağında əməlli-başlıca mübahisə baş verir və mübahisə zamanı icra başçısı İbrahim Mustafayevin yanında rayon prokuroru Allahverdi Səfərov, məhkəmənin sədri Maarif Kazımov, polis şöbəsinin rəisi Mehman Həşimov olurlar. Mübahisə getdikcə qızışır və o halda polis rəisi Mehman Həşimov şöbəyə zəng vurur və əlavə polis qüvvələrinin gəlməsi haqda əmr də verir. Həmin anlarda polis rəisinin Cahangir Qasımovla əlbəyaxa olduğu da söylənilir. Elə ki, tərəflər arasında mübahisə şiddətlənir və çox keçmir ki, Cahangir Qasımovun ürəyi yatır və o, icra başçısının iş otağında dünyasını dəyişir.

Təəccüb doğuran hal o olur ki, işdən çıxarılmış icra nümayəndəsi dünyasını dəyişsə də, onun yaxın qohum-əqrəbalarını içəri buraxmırlar və “özünün ürəyi yatdı” deyə belə bir təbliğat aparırlar. Övladları RF-nın ərazisində olduğundan, mərhumun qardaş və bacıları, yaxınları baş verən hadisənin bütün günahını İbrahim Mustafayevdə görürlər. Hal-hazırda icra hakimiyyətinin binasını polis rəisi ciddi şəkildə mühafizə etdirir. Dünən günün müxtəlif saatlarında mərhumun yas yerinə Şınıxdan, Bakıdan və digər yerlərdən çoxlu sayda qohum-əqrəbalarının gəldikləri, ryonun idarə-müəssisə rəhbərlərinin yas yerində olduqları söylənilir. Hətta, sakinlər arasında belə bir məlumat da dolaşmaqdadır ki, prokuror Allahverdi Səfərov mərhumun qardaşlarına “siz şikayət etməyin” deyə minnətçi düşüb və bunun qarşılığında Cahangir Qasımovun qardaşlarına, yaxınlarına yaxşı vəzifə veriləcəyi də bildirilir. Belə bir səbəb üzündən də, rayonda ümumi vəziyyətin hələ də gərgin olaraq qaldığı bildirilir. Qarşı tərəfin də mövqeyini dinləməyə hazırıq!
Mövzu diqqətimizdədir.

GundemXeber.az