Xalqımız savaş, yoxsa sülh istəyir? - VİDEOSORĞU

Azərbaycanlılar silahlı əməliyyatların davam etdirilməsinə necə baxırlar?

Ötən gecə cəbhə xəttində baş verənlər də göstərdi ki, ermənilər təxribatçı hücumlarından geri çəkilmək niyyətində deyillər. Azərbaycan tərəfi də haqlı olaraq, hər dəfə bu təxribatların qarşısını layiqincə almaqda israrlıdır. Yəni, sözdə atəşkəs elan olunsa da, əslində silahlı əməliyyatlar davam etdirilir. Ekspertlər də təsdiqləyir ki, yaxın müddətdə Dağlıq Qarabağ münaqişəsi ilə bağlı danışıqlarda müsbət bir nəticəyə gəlmək mümkün olmasa, geniş miqyaslı hərbi əməliyyatlar başlaya bilər.

Bəs, görəsən aprelin 2-də başlayan 4 günlük müharibədə bütün əzmini ortaya qoyan Azərbaycan xalqı hazırda cəbhə xəttində hərbi əməliyyatların davam etməsini istəyirmi? Onlar torpaqlarımızın danışıqlar, yoxsa hərbi yolla qaytarılmasını arzu edirlər?
Musavat.com bu mövzu ilə bağlı ictimai rəyi öyrənmək üçün şəhər sakinləri arasında sorğu keçirib.

Sorğu iştirakçıları birmənalı olaraq, Azərbaycan ordusunun yanında olduqlarını bildirib, təxribatçı düşmənə qarşı hərbi əməliyyatların davam etdirilməsinin vacibliyini vurğulayıblar.
Soğrudan bəlli oldu ki, əhali torpaqlarımızın sülh yolu ilə azad edilməsini istəsə də, bu mümkün olmaqdıqda, hərbi əməliyyatlarla qaytarılmasını arzulayır.

Respondentlərin cavablarında əsas məqam o oldu ki, onlar ordumuzun bir neçə günə işğal altındakı torpaqlarımızı azad edəcəyinə əmindirlər. Bu baxımdan, hərbi əməliyyatların davam etdirilməsinin tərəfdarıdırlar. Lakin itki verməmək üçün danışıqların davam etdirilməsini daha məqsədəuyğun sayırlar.
Sülh tərəfdarı olanlar isə əsgərlərimizin şəhid olmasını istəmədiklərini bildirdilər.

Daha ətraflı təqdim etdiyimiz videosorğudan izləyə bilərsiniz.

Məğrur Mərd, musavat.com