Prezident tıxaca düşdü- General cəzalandırıldı

Bakı Şəhər Baş Polis İdarəsinin rəsi müavini, general-mayor Həsən Şirinov prezidenti müşayiət etmək hüququndan yenə də məhrum olunub.

“Gunpress.az” məlumat verir ki, virtualaz.org saytı hüquq-mühafizə orqanlarından əldə etdiyi xəbərə görə, H.Şirinov yenə də prezidenti müşayiət etmək hüququndan məhrum olunub. Məlumata görə, H.Şirinov şəhərdə yaranmış tıxacda yenə özünü itirib. Nəticədə prezident İ.Əliyevin korteji yenə tıxacda qalıb.

Xəbərə görə, hadisə dekabrın 26-da prezidentin korteji metronun “Koroğlu” stansiyasının yaxınlığından keçərkən baş verib. Plana görə, prezident korteji hərəkətin məhdudlaşdırıldığı küçələrdən keçməli imiş. Lakin H.Şirinovun səhvi ucbatından karvan başqa küçəyə burulub. Bu isə kortejin uzun tıxacın yaşandığı küçəyə dönməsi ilə nəticələnib.

Çox maraqlıdır ki, H.Şirinov prezidentin kortejinin tıxaca düşməsi ilə bağlı artıq ikinci dəfədir öz vəzifəsini itirir.

Əvvəlki insident prezident İ.Əliyev Gürcüstanın sabiq prezidenti Eduard Şevardnadzenin vəfatı ilə bağlı başsağlığı vermək üçün Gürcüstanın Bakıdakı səfirliyinə gedərkən baş vermişdi.

Qaydaya görə, prezidentin kortejini Bakı Şəhər Baş Dövlət Yol Polisi İdarəsi rəisinin müavini, general-mayor Həsən Şirinov müşayiət edir.

H.Şirinovun sürücüsü yolu səhv salaraq “Gənclik” tərəfə aparan tunelə girib. Sonradan bəlli olub ki, buna general H.Şirinovun sürücüsünün günahı səbəb olub. Prezidentin korteji tıxacdan çıxandan sonra generalın maşını əlindən alınıb. Sonra isə sürücü polis orqanlarından qovulub.