Müdafiə Nazirliyinin Maddi-Texniki Təminat Baş İdarəsində kollegiya iclası keçirilib

Müdafiə Nazirliyinin Maddi-Texniki Təminat Baş İdarəsinin tabeliyində olan hərbi hissə, anbar, baza, mənzil-istismar hissələri və hərbi komendantlıqlarda 2015-ci ilin birinci rübünün döyüş və mənəvi-psixoloji hazırlığının, qoşun xidmətinin, hərbi intizamın təhlili və qarşıya qoyulmuş tapşırıqlara həsr olunan geniş kollegiya iclası keçirilib.
"Gunpress.az-ın "Azərbaycan ordusu” qəzetinə istinadən verdiyi məlumata görə, kollegiya iclasını giriş sözü ilə açan müdafiə nazirinin maddi-texniki təminat üzrə müavini - Maddi-Texniki Təminat Baş İdarəsinin rəisi vəzifəsini icra edən general-mayor Qorxmaz Qarayev tədbirin gündəliyindəki məsələləri iştirakçıların diqqətinə çatdırıb.
Məruzə ilə çıxış edən general-mayor Q.Qarayev Azərbaycan Prezidenti, Silahlı Qüvvələrin Ali Baş Komandanı İlham Əliyevin ordu quruculuğuna göstərdiyi diqqət və qayğıdan ətraflı söhbət açaraq bildirib ki, Silahlı Qüvvələr tam inkişaf dövrünü yaşayır: "Son vaxtlar Azərbaycanın bütün sahələrində olduğu kimi, ordu quruculuğunda da inamlı addımlar atılır. Bu gün Silahlı Qüvvələrdə aparılan islahatlar və məqsədyönlü siyasətin nəticəsi olaraq ordumuz inkişaf edir, şəxsi heyətin sosial-məişət şəraitinin yaxşılaşdırılması istiqamətində tədbirlər davam etdirilir. Xüsusilə qeyd etmək istərdim ki, müdafiə naziri, general-polkovnik Zakir Həsənovun rəhbərliyi ilə orduda aparılan islahatlar, hərbi hissələrin maddi-texniki və sosial-məişət şəraitinin müasir tələblər səviyyəsinə yüksəldilməsi həm orduda, həm də cəmiyyətdə rəğbətlə qarşılanır.
Silahlı Qüvvələrin Baş Qərargah rəisi, general-polkovnik Nəcməddin Sadıkov 2015-ci tədris ilində qoşunların hazırlığı üzrə təşkilati göstərişlərində vurğulayıb ki, yüksək nailiyyətlərin əldə edilməsi üçün Silahlı Qüvvələrin aşağıdakı əsas məqsədləri Ali Baş Komandan tərəfindən müəyyən edilib:
"Dövlətin milli təhlükəsizliyinə qarşı ehtimal olunan hərbi təhdidlərin qarşısının vaxtında alınması və Azərbaycan Respublikasına istiqamətləndirilmiş təcavüzün dəf edilməsi məqsədi ilə qoşunların tələb edilən döyüşə və səfərbərliyə hazırlıq səviyyəsində saxlanılması;
Hərbi-siyasi vəziyyətin istənilən şəraitində Azərbaycan Respublikası ərazisinin bütövlüyü və toxunulmazlığının silahlı müdafiəsi üçün Silahlı Qüvvələrə zəruri olan qabiliyyətlərin daimi inkişafı və təkmilləşdirilməsi;
İşğal edilmiş torpaqları erməni təcavüzkarlarından azad etmək məqsədilə Silahlı Qüvvələrin fəal və qətiyyətli hücum əməliyyatlarına hazırlıq tədbirlərinin təşkili və həyata keçirilməsi”.
Tədbir müdafiə naziri, general-polkovnik Zakir Həsənovun Maddi-Texniki Təminat Baş İdarəsinin tabeliyində olan hərbi hissə və müəssisələrə son səfərini əks etdirən videosüjetlərin nümayişi ilə başa çatıb.