Şəhid övladlarına İKT mövzusunda təlimlər keçirildi - FOTOLAR

May 2023-cü il tarixində İnnovasiya və Rəqəmsal İnkişaf Agentliyinin və "Zəfər" Şəhid Ailələrinə Dəstək İctimai Birliyinin birgə təşkilatçılığı ilə “Beynəlxalq İKT-də qızlar günü” adlı tədbir keçirilib.

8-14 yaş aralığında 30 nəfər şəhid övladının iştirak etdiyi tədbir İRİA-nın sədr əvəzi İnara Vəliyeva və "Zəfər" Şəhid Ailələrinə Dəstək İctimai Birliyinin sədri Sevinc Alızadənin açılış nitqləri ilə başlayıb. Tədbirin davamında “İKT nədir?”, ölkədə bu sahənin aktuallığı, texnologiyanın keçdiyi inkişaf yolu ilə mövzusunda interaktiv təqdimatlar keçirilib. İKT sahəsində ən son trendlər, iş imkanları, gələcəyin peşələri istiqamətində danışılıb.

Eyni zamanda “Technest” təqaüd proqramının top universitetlərə qəbul olmuş tələbələrinin çıxışları baş tutub. Onlar öz çıxışlarında uğur hekayələrini bölüşərək iştirakçılara öz təklif və tövsiyyələrini bildiriblər.

Tədbir çərçivəsində Agentliyin tərəfdaşları olan “Mars Academy” tərəfindən robotexnika, proqramlaşdırma sahələrinə dair maraqlı təlimlər, masterklasslar təşkil olunub.

Sonda “İRŞAD” tərəfindən tədbir iştirakçılarına hədiyyələr təqdim olunub.

Qeyd edək ki, “İKT-də Qızlar” günü Birləşmiş Millətlər Təşkilatının (BMT) informasiya-kommunikasiya texnologiyaları (İKT) sahəsində ixtisaslaşdırılmış qurumu olan Beynəlxalq Telekommunikasiya İttifaqı (BTİ) tərəfindən təsis edilib. “İKT-də Qızlar” gününün keçirilməsinin məqsədi qızları İKT sahəsinə cəlb etmək, bu sahədə onların rolunun artırılmasına dəstək verməkdir.