Dövlət orqanlarına antikorrupsiya təlimləri keçirilib

“Şəffaflıq” Azərbaycan Korrupsiyaya Qarşı Mübarizə İB –nin Azərbaycan Respublikasının Korrupsiyaya Qarşı Mübarizə üzrə Komissiyasının dəstəyi ilə həyata keçirilən layihə çərçivəsində 13 dövlət orqanının 375 əməkdaşına korrupsiyaya qarşı mübarizə və etik davranış qaydaları ilə bağlı təlimlər keçirilib.

Təlimlər 2022-ci ilin fevral iyun aylarını əhatə etməklə “Dövlət qulluqçuları üçün korrupsiyaya qarşı mübarizə və etik davranış qaydaları ilə bağlı onlayn təlim kurslarının təşkili” layihəsi çərçivəsində baş tutub.

Təlimlərə Ədliyyə Nazirliyi, Kənd Təsərrüfatı Nazirliyi, Rəqəmsal İnkişaf və Nəqliyyat Nazirliyi, Mədəniyyət Nazirliyi, Ekologiya və Təbii Sərvətlər Nazirliyi, Energetika Nazirliyi, Mədəniyyət Nazirliyi, Səhiyyə Nazirliyi, Əmlak Məsələləri Dövlət Xidməti, Sumqayıt və Suraxanı rayon icra hakmiyyətlərinin əməkdaşları cəlb olunub.
“Antikorrupsiya və etik davranış qaydaları mövzusunda” keçirilən təlimin Azərbaycan Respublikası Prezidentinin 04 aprel 2022-ci il tarixli 3199 nömrəli Sərəncamı ilə təsdiq edilmiş “Açıq hökumətin təşviqinə dair 2022-2026-cı illər üçün Milli Fəaliyyət Planı”nın icrasını təmin etmək məqsədilə təşkil olunub.

Təlim iştirakçılarına korrupsiya ilə əlaqədar hüquqpozmaların subyektləri, korrupsiya ilə əlaqədar hüquqpozmalar barədə müraciətə baxılması, korrupsiya riskləri və onların qarşısının alınması, dövlət qulluqçularının etik davranış qaydaları, dövlət qulluğu etikası ilə bağlı prinsip və dəyərlərin məqsədi, etik davranış qaydalarının pozulmasına görə məsuliyyət və s. məsələlərlə bağlı ətraflı məlumatlar verilib
.
Korrupsiya ilə əlaqədar hüquqpozmalara və etik davranış qaydalarına dair konkret keyslər iştirakçılarla birgə təhlil edilib.