Kollecdəki özbaşınalıqlar üzə çıxdı – SAXTA diplomlar verilib

"Qazax Dövlət Sosial-İqtisadi Kollecində tədris işləri üzrə direktor müavini vəzifəsində işlədiyim vaxt tədris işləri üzrə direktor müavininin təsdiqləməli olduğu bütün fənn jurnallarını öz imzamla təsdiqlədim və mümkün dəyişmə hallarının qarşısını almaq məqsədilə jurnal vərəqlərinin hər birinə tədris hissəsinin möhürü vuruldu.
Deməli, 2017/2018-ci tədris ilində əvvəlki ab-havanın olacağını düşünən tələbələrin bir qismi dərsə ümumiyyətlə gəlmirdi. Buna görə də tez bir zamanda davamiyyətə görə verilən limiti aşdılar və imtahan sessiyası zamanı heç bir fəndən imtahana buraxılmadılar. Bunların içərisində sonuncu kursda təhsil alanlar da vardı”.
Bu barədə Qazax Dövlət Sosial-İqtisadi Kollecinin tədris işləri üzrə sabiq direktor müavini Nicat Göyüşov tədris ocağındakı özbaşınalıqlar barədə açıqlama verərkən deyib:
“Aldığım məlumata görə, həmin tələbələr diplom alıblar. Bunun üçün onlar alt və ya şərti qruplarda kəsildildikləri fənləri dinləməli, kredit toplamalı idilər. Həmin tələbələrin əksəriyyəti vaxtında diplom ala bilməzdi, ən azı bir il geri düşərdi.
Direktor imtahana buraxılmayan, kəsrə qalan bu gənclərdən ötrü jurnalın dəyişdirilməsinə imkan yaradıb. Sonra da birbaşa qiymətləri yazılıb və adları diplom alanların siyahısına salınıb.
Hələ bir az da irəli gedərək dəyişdirilən jurnallara mənim imzamın eynisini çəkiblər. Bax, nə qanunsuzluq edirsiniz özünüz və aidiyyatı orqanları bilər, yaxşı, imzamın eynisini dəyişdirdiyiniz jurnala çəkərək məni niyə çirkin işlərinizə ortaq etməyə çalışırsınız?
Bu, Təhsil Nazirliyini aldadaraq SAXTA diplom verilməsi deməkdir və jurnal dövlət sənədi olduğu üçün onun belə dəyişdirilməsi ciddi qanunsuzluqdur. Ona görə də, aidiyyatı orqanlardan şahidlərdən aldığım bu məlumatın doğru olub-olmadığının araşdırılması və təsdiqini taparsa, qanuni addım atılması üçün köməklik göstərmələrini xahiş edirəm”.