Əli Cəfərov: “Hər bir masallılının probleminin həllinə kömək etmək istəyirəm”

Demokratik İslahatlar Partiyasının funksioneri, Demokratiyanın və Milli Dəyərlərin Təbliği İctimai Birliyinin sədri Əli Cəfərovun millət vəkilliyini namizədliyi 70 saylı Masallı şəhər seçki dairəsindən irəli sürüləcəkdir.

Bu məqsədlə ilkin hazırlıq işlərinə start verilmişdir. Belə ki artıq namizədin seçki qərargahı da fəaliyyətə başlayıb.
Məlumatı dəqiqləşdirmək məqsədilə müxbirimiz Əli Cəfərovla əlaqə saxlayıb. DİP təmsilçisi haqqında yazılanların həqiqətə uyğun olduğunu qeyd edib. O, bildirib ki, namizədliyini 70 saylı Masallı şəhər SD tərəfindən irəli sürəcəkdir. Eyni zamanda onu da qeyd edib ki, vaxtilə də bu dairədən seçkilərə qatılıb: “Bu günə kimi Masallını Milli Məclisdə təmsil edən deputatlar elə SSRİ ənənəsinə uyğun deputat olaraq qalmaqla öz işlərini bitmiş hesab etdilər. Onların heç biri nə regionun, nə də xalqın əsl vəkilinə çevrilə bilmədilər. Ancaq öz mənafelərini güddülər. Rayonun heç bir problemini ali orqan qarsısında qaldırmadılar. Onların işi ağızlarına su alıb oturmaqdan ibarət oldu. Rayonda isə məmur özbaşınalığı və süründürməçilik baş alıb gedir. Bütün bunlara son qoymağın zamanıdır. Məhz bu amilləri nəzərə alaraq mən yenidən namizədliyimi irəli sürür və hər bir masallılının probleminin həllinə kömək etmək istəyirəm”.
Qeyd: Onu da bildirirəm ki, Əli Cəfərov 1962-ci ildə Masallı rayon Qargalıq kəndində anadan olub. Ali təhsillidir. 2 övladı, 3 nəvəsi var. Hal-hazırda Bakı şəhərində yaşayır.