"Gənc tədqiqatçılar üçün Open Academy" layihəsi çərçivəsində seminarlar keçirilib

Azərbaycan Gənc Alim, Aspirant və Magistrlər Cəmiyyəti Azərbaycan Respublikasının Gənclər Fondunun dəstəyi ilə “Gənc tədqiqatçılar üçün Open Academy” adlı layihə çərçivəsində Bakı, Gəncə və Mingəçevir şəhərlərində yerləşən universitetlərdə gənc alimlər, doktorantlar, magistrlər, universitet müəllimləri, elmi tədqiqatçılar üçün seminarlar keçirmişdir.
Seminarlar Azərbaycan Dövlət Aqrar Universitetində, Mingəçevir Dövlət Universitetində və Azərbaycan Dövlət Pedoqoji Universitetində təşkil olunmuşdur.
Azərbaycan Gənc Alim, Aspirant və Magistrlər Cəmiyyətinin sədri, Təhsil Nazirliyi yanında İctimai Şuranın məsul katibi fəlsəfə doktoru İlqar Orucov layihə haqqında iştirakçılara məlumat vermişdir.
Azərbaycan Dövlət Pedaqoji Universitetinin elm və innovasiya üzrə prorektoru, professor Asəf Zamanov, Azərbaycan Dövlət Aqrar Universitetinin prorektoru, fəlsəfə doktoru Ramin Məmmədov, Mingəçevir Dövlət Universitetinin prorektoru, professor Veysəl Eyyubov layihənin gənc tədqiqatçılar üçün əhəmiyyətindən və dünya elm məkanında müasir çağırışlara uyğun olaraq gənc tədqiatçılarımızın hazırlanmasında bu cür layihələrin vacibliyini ifadə etmişlər.
Azərbaycan Gənc Alim, Aspirant və Magistrlər Cəmiyyətinin nümayəndəsi, layihənin eksperti fəlsəfə doktoru Ruslan Rəhimli Open Academy çərçivəsində keçirilən seminarlar vasitəsilə gənc tədqiqatçılar “crowdfunding” platformaları, “open science”, “open access”, “open innovation”, “open educational resources”, “Creative Common” haqqında geniş bilik və informasiyalara yiyələnmişlər.
İştirakçılara Avropa elmi məkanında geniş tətbiq olunan və Avropa İttifaqının prioritet olaraq qəbul etdiyi “Open Science” platforması və onun özəllikləri haqqında prezentasiyalar təqdim edilmişdir. Eyni zamanda iştirakçılar Open Access jurnallarına çıxış imkanları, ORCİD və digər platformalar haqqında geniş biliklər əldə etmişlər.
Seminarlarda hər Universitetdən 80 iştirakçı olmaqla ümumilikdə 240 gənc alim, doktorant, , magistrant iştirak etmişdir. Tədbirlər qarşılıqlı diskussiya şəraitində keçirilmiş və iştirakçıların sualları cavablandırılmışdır.
Hər universitetdə 2 gün ərzində təşkil olunan seminarların yekununda iştirakçılara sertifikatlar təqdim olunmuşdur.