Bakıda şok hadisə; kişi 34 yaşlı arvadını 8 ay zəncirdə saxlayıb

Bakıda baş vermiş dəhşətli cinayət əməli ilə bağlı polisə müraciət daxil olub.

Lent.az-ın hüquq-mühafizə orqanlarından əldə etdiyi məlumata görə, Səbayel rayonu, Nemanzadə küçəsində (20-ci sahə adlanan ərazidə yerləşir) yaşayan 1980-ci il təvəllüdlü Almazova Fidan Veyis qızı (adlar şərtidir) saat 00:15 radələrində Səbayel Rayon Polis İdarəsi 8-ci polis bölməsinə gedib.

Qadın bildirib ki, həyat yoldaşı, 1977-ci il təvəllüdlü Almazov Rafael Ramazan oğlu (adlar şərtidir) uzun müddətdir ki, ona dəhşətli işgəncələr verir. 34 yaşlı qadın qeyd edib ki, bu ilin yanvar ayında həyat yoldaşı onu vəhşicəsinə döyərək qolunu sındırıb. Daha sonra o, qadını 8 ay müddətində qapalı otaqda zəncirlənmiş formada saxlayıb və onu dəfələrlə döyüb, digər alçaldıcı hərəkətlər edib.

F.Almazova qeyd edib ki, 8 ay müddətində otaqdan bayıra çıxa bilməyib və ilk fürsət düşən kimi polisə müraciət edib. Qadın onu da qeyd edib ki, əri onu polisə müraciət edəcəyi təqdirdə ölümlə hədələyib. Hazırda məsələ ilə bağlı araşdırmalar aparılır.