Qarabağ müharibəsi veteranları müavinətlərini ala bilmirlər - "Nazirlik niyə bizi incidir?"

Sosial müavinət alan müharibə veteranlarına yeni təsis olunmuş aylıq təqaüdlə (80 manat) bağlı narazılıq davam edir.

Bu barədə GÜNpress.az-a keçmiş döyüşçü, Qarabağ müharibəsi veteranı Vaqif Əlisoy məlumat verib. O bildirib ki, Əmək və Əhalinin Sosial Müdafiəsi Nazirliyi Prezidentin müvafiq sərəncamından irəli gələn tədbirləri həyata keçirmir:

"Ölkə başçısı müharibə veteranlarının müraciətini nəzərə alaraq, sərəncam imzaladı və aylıq təqaüd 80 manat oldu. Sərəncamda göstərildi ki, aprel ayı bu müavinətlər verilsin. Artıq may ayının ilk ongünlüyüdür, amma hələ də həmin vəsaiti ala bilməmişik. Onu da nəzərə çatdırım ki, 80 manatı almaq üçün bütün veteranlardan şəxsiyyət vəsiqəsinin və veteranlıq vəsiqəsinin notariusda təsdiqlənmiş surətini itsəyiblər. Hər kəs artıq bir aya yaxındır ki, o sənədləri müvafiq qurumlara təqdim edib, lakin hələ də ortada bir şey yoxdur. Halbuki bu sənədlərə ehtiyac yox idi, onsuz da hamının şəxsi işində bu məlumatlar var. Sadəcə olaraq, Nazirlik niyə bizi incidir, nəyə görə Prezidentin sərəncamını yerinə yetirmirlər, onu başa düşmürük".

Onu da nəzərə çatdıraq ki, aprelin 29-da Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsi bu məsələ ilə bağlı məlumat yayıb. Nazilikdən bildirilib ki, artıq aprel ayı üzrə sosial müavinət və təqaüdlər artırılmış məbləğlərdə ödənilib:

"Eyni zamanda, sosial müavinət alan müharibə veteranlarına yeni təsis olunmuş aylıq təqaüd (80 manat) da verilib. Əmək pensiyası alan I dərəcə əlilliyi olan şəxslər üçün 100 manat, onlara və həmçinin sağlamlıq imkanları məhdud uşaqlara qulluq edənlər üçün aylıq 50 manat, əmək pensiyası alan müharibə veteranları üçün aylıq 80 manat yeni təqaüdlərin verilməsi üçün isə normativ qaydaların layihəsi hazırlanaraq artıq təqdim edilib. Qaydalar təsdiq edildikdən sonra həmin vətəndaşlardan sənədlər qəbul olunmaqla, onlara yeni təqaüdlərin təyin olunaraq gələn ayın sosial müavinət və ya pensiyaları ilə birgə verilməsi (aprel ayının da təqaüdü daxil olmaqla) təmin ediləcək".

GÜNpress.az