Oliqarx uşaqları “Maserati”lərlə Bakıdan İtaliyaya yürüşə gedir

İtaliyanın dəbdəbəli idman avtomobilləri markası “Maserati” bu şirkətin 100 illiyi ilə bağlı üç gün davam edəcək təntənəli tədbirlər təşkil edir.

Virtualaz.org saytı İtaliya mediasına istinadən xəbər verir ki, təntənəli mərasimlər sentyabrın 18-də Modena şəhərində başlayacaq və sentyabrın 20-də Turində başa çatacaq.

Üç günlük mərasimlərə “Maserati” avtomobillərinin təntənəli yürüşü, sərgi, sürət yarışı, “Maserati”nin zavoduna ekskursiya və s. daxildir.

Tədbirlərə dünyanın müxtəlif ölkələrindən “Maserati” sahibləri dəvət olunub. Bura həm son model “Maserati”lərin sahibləri, həm klassik modellərin sahibləri, həm də “Maserati” kolleksiyaçıları daxildir.


Bütün dövrlərdə istehsal edilmiş, həm klassik, həm də müasir “Maserati”lərdən ibarət 200-dən çox avtomobilin iştirakı ilə keçiriləcək yürüş tədbirlərin ən yaddaqalan hissəsi olacaq. Bu yürüşı qatılacaq son model “Maserati”lərin sahibləri ABŞ, Çin, Koreya, Rusiya, Birləşmiş Ərəb Əmirlikləri və Azərbaycandan dəvət olunublar. Klassik “Maserati” sahibləri isə Avstraliyadan, Norveçdən, İsveçdən və bəzi digər Avropa ölkələrindən dəvət ediliblər.

Qeyd edək ki, “Maserati” şirkəti Azərbaycanda nümayəndəliyini təqribən iki il əvvəl açıb. Qiyməti bir neçə yüz min dollardan milyon dollara qədər dəyişə bilən bu avtomobillərin əsas müştəriləri təbii ki, zəngin iş adamlarının, məmur-oliqarxların uşaqları, şou-biznes əhli, idmançılar və digər bu kimi varlılardır.