Hafiz Hacıyev: “Bu, Rusiya xalqına qarşı xoş gələcək vəd etməyəcək”

“Ümumiyyətlə Rusiya prezidenti haqqında kim nə deyir-desin, (imperator, çar, Nikolay və s.) bu onların öz işləridir. Çünki, orada müəyyən həvəskar insanlar var”. Bunu SİA-ya Müasir Müsavat Partiyasının sədri Hafiz Hacıyev Rusiya prezidenti Vladimir Putinin imperator elan olunmasının arxasında dayanan məqamlara münasibət bildirərkən deyib.

Partiya sədrinin sözlərinə görə, necə ki əvvəllər Azərbaycanda bəzi insanlar Qəmbərov İsanı özlərinə xilaskar elan etmişdilər, indi də Vladimir Putin imperator adlandırılır: “Bu gün Putinin apardığı siyasət düzgün siyasət deyil. Bu, Rusiya xalqına qarşı xoş gələcək vəd etməyəcək. Yəni, millətini, xalqını sevən və gələcəyi düşünən adamlar gedib başqa dövlətlərin torpaqlarını işğal etməz. Bütün bunlar millətin gələcəyini məhvə doğru aparmağa hesablanmış addımlardır. Məsələn, bu gün Vladimir Putinin Rusiya xalqına etdiyi zülm heç çar imperiyası dövründə olmayıb. Axı buna nə lüzum var idi ki, başqa dövlətin ərazisinə girəsən və Krımı işğal edəsən? Əgər biz Putinə bəraət qazandıracayıqsa, onda gərək Rober Koçaryana da haqq verək ki, o bizim ərazilərimizi işğal edib. Bu mənada hesab edirəm ki, Rusiya prezidentinin imperator, çar adlandırılması orada olan yaltaq, ikiüzlü qrupların işidir. Hərhalda düşünürəm ki, Putinin apardığı siyasət Rusiya xalqına dinclik gətirmir və gələcəyə heç nə xoş vəd etmir”.