“Akif Muradverdiyev təcili əməliyyat olunmalıdır”

Prezidentin sabiq işlər müdiri Akif Muradverdiyevin təcili əməliyyat olunmağa ehtiyacı var.

Bunu bu gün “Media forum” saytına vəkil Rəşad Mirmehdizadə deyib. Vəkilin bildirdiyinə görə, 65 yaşlı Akif Muradverdiyevin boyun fəqərəsində olan yırtıq böyüyüb: “O, həbsxana şəraitində – saxlandığı 16 saylı Cəzaçəkmə Müəssisəsində müalicə olunur, amma müalicə nəticə vermir. Səhhətindəki problem ciddidir, Akif Muradverdiyev təcili əməliyyat olunmalıdır. Yalnız əməliyyatdan sonra onun səhhətində müsbət bir dəyişiklik ola bilər”.

Xatırladaq ki, Akif Muradverdiyev 2013-cü ilin iyun ayında tutulub, Xəzər Rayon Məhkəməsinin həmin il dekabrın 13-də çıxardığı qərarla qaçaqmalçılıqda təqsirli bilinərək 4 il müddətinə azadlıqdan məhrum edilib. Bakı Apelyasiya Məhkəməsi 2014-cü il fevralın 12-də bu hökmü qüvvədə saxlayıb.

Akif Muradverdiyev prezidentin işlər müdiri vəzifəsindən azad edilən vaxt – 2005-ci ilin oktyabrında da tutulmuşdu. O zaman dövlət çevrilişinə cəhdə hazırlıq ittihamı ilə həbs edilən, sonradan iqtisadi cinayətlərə görə 6 il azadlıqdan məhrum olunan Akif Muradverdiyev 2008-ci il yanvarın 15-də Ali Məhkəmənin qərarı ilə sərbəst buraxılmışdı. Ali Məhkəmə onun cəzasını 5 il sınaq müddətli şərti cəza ilə əvəz etmişdi.