"Ona-buna yalvarıb ölülərimizi başqa kəndlərdə dəfn etmişik" - Lələtəpəyə buraxılmayan cəbrayıllılardan etiraz

Bildiyiniz kimi, Lələtəpə yüksəkliyi 2016-cı ildə Azərbaycan Ordusu tərəfindən həyata keçirilən əməliyyatla düşməndən azad edildi. Artıq 6 ildir yüksəkliyin Azərbaycan nəzarətində olmasına baxmayaraq, Cəbrayıl rayonunun Cocuq Mərcanlı kəndinin sakinləri Lələtəpədə yerləşən yerləşən qəbiristanlığa gedə bilmir.
Bu barədə GÜNpress.az-a müraciətində kənd sakini Elməddin Nəcəfov məlumat verib.
"Bizim kəndin qəbiristanlığı Lələtəpədə yerləşir. Bu qəbiristanlığın tarixi bizim eradan əvvələ gedib çıxır. Nənələrimiz, babalarımız hamısı həmin qəbiristanlıqda dəfn olunublar. Hətta Birinci Qarabağ Müharibəsinin şəhidləri də orada dəfn olunub. 30 illik işğal dövründə biz rəhmətə gedən yaxınlarımızı ona-buna yalvararaq digər kəndlərdə dəfn etmişik.
Lələtəpə yüksəkliyi azad olunduqdan bu günədək, artıq 6 ildən çoxdur ki, heç kim həmin qəbiristanlığa gedə bilməyib. Bizim istəyimiz ondan ibarətdir ki, kənd sakinlərinin qəbiristanlığa getmələrinə icazə verilsin. Ölülərimizi öz kəndimizin qəbiristanlığında dəfn edək, şəhidlərimizin məzarını ziyarət edək, dağılan qəbirlərimizi yenidən qəbir formasına salaq.
Bu məsələ ilə bağlı Cəbrayıl Rayon İcra Hakimiyyətinə, rayon polis şöbəsinə, Prezident Administrasiyasına və digər dövlət qurumlarına müraciət etmişik. Hələ də, məsələ öz həllini tapmayıb. Bizə dedilər ki, istəyirsinizsə, gedin başqa yerdə qəbiristanlıq salın. Bizim kənd də elə yerdə yerləşir ki, haranı qazsan, su çıxır. Yəni, kəndin başqa yerində qəbiristanlıq salmaq mümkün deyil", - deyə o bildirib.