İcra başçısının müavininə hücum olub - Qalmaqal

Bu gün bir sıra Kiv- də sosial şəbəkələrdə Gəncə şəhər icra hakimiyyətinin başçısı Elmar Vəliyevin Yevlax rayonunda bir sahibkar tərəfindən bıçaqlı hücuma məruz qaldığı haqda xəbər yayılıb.

Yayılan xəbərdə bildirilir ki, Gəncə şəhər icra hakimiyyətinin başçısı Elmar Vəliyev bu gün Yevlaxda olarkən bir dükanın qarşısında ayaq saxlayaraq, mağazanın qarşısının zibilli olmasını dükanın sahibinə irad tutub. Nəticədə, Elmar Vəliyevlə sahibkar arasında mübahisə yaranıb. Daha sonra mübahisə böyüyüb və tərəflər qarşılıqlı söyüşlərə keçiblər. Vəziyyətin gərginləşəcəyini görən polislər məsələyə müdaxilə edərək sahibkarı polis idarəsinə aparıblar. Hal- hazırda sahibkarın polis idarəsində saxlanıldığı bildirilir.

Gunpress.az xəbər verir ki, bu olayla bağlı Yevlax rayon icra hakimiyyətinin başçısı Qoca Səmədov "Ucnoqta.az saytına danışıb. İcra başçısı saytımıza açıqlamasında, bu məsələnin Elmar Vəliyevlə heş bir əlaqəsinin olmadığını bildirib:

"Mən sizə deyim ki, Elmar Vəliyevin bu dəqiqə Gəncədən çıxmağa vaxtı yoxdur. Cənab Prezidentin bu yaxınlarda Gəncə şəhərinə səfəri gözlənilir. Orda çoxlu işlər görülür. Elmar müəllimin bura gəlməsi və belə hadisəni yaşaması uydumadı. Dediyiniz hadisə rayon ərazisində yerləşən "Üç qardaş” deyilən marketin sahibləri Nəbiyev Vüsal və Vüqar qardaşları ilə rmənim müavinin olan Namiq Süleymanov arasında baş verib. Onlar mənim müavinimi söyüb, təhqir ediblər. Çox tərbiyyəsiz insanlardı bu şəxslər. Küçə ticarəti ilə məşquldurlar. Mən göstəriş vermişəm ki, küçə ticarəti yığışdırılsın. Bunların da atası Inqilab kişi bir neçə gün qabaq mənim qəbulumda olarkən, xahiş etdi ki, bir az malımız qalıb satıb yıqışdıraq. Mən də icazə verdim, amma neçə gün keçib, hələ də yığışdırmayıblar. Bu gün müdaxilə edilib və nəticədə polislərə də, mənim müavinimə də hücum ediblər. Məsələ bundan ibarətdir. İnsidenti yaradan şəxslər hal- hazırda polis idarəsindədir, qanunlara uyğun hərəkət ediləcək”.