“Sahil Babayev Səlim Müslümovun atasına rəhmət oxutdurur” – Hökumət üzvlərinə şok ittihamlar

“Hər zaman demişəm, indi də deyirəm, hakimiyyətin daxilində Prezidenti nüfuzdan salmaqdan ötrü bütün gücü ilə çalışan xüsusi qrup var”.

Bunu GÜNpress.az-a açıqlamasında MMP sədri Hafiz Hacıyev deyib. Onun sözlərinə görə, həmin qrup nümayəndələri bilirlər ki, ölkədə stabillik olsa, özləri kimi korrupsionerlər vəzifədə qala bilməyəcək:

“Veterranlara, əlillərə, sağlamlığı məhdud uşaqlara müavinət ayrılır, sərəncam verilir, amma nazirlik işi uzadır, süründürməçilik edir. İndi biz buna nə ad verək? Prezident məhkəmə-hüquq islahatları ilə bağlı sərəncam verdi, Ali Məhkəmənin sədri Ramiz Rzayev bir-iki adamı toplayıb müşavirə keçirdi, vəssəlam. Bu adamlarla hansı islahat keçirmək olar axı?
Sahil Babayevin bu millətə zərrə qədər ürəyi yanmır. Bu adam şəhid ailəsi, Qarabağ qazisi, veteran qədri biləndirmi? Ondan olsa, hamı qırılar, təki bunlar rahat yaşasınlar. Sahil Babayev bu bir ildə Səlim Müslümovun atasına rəhmət oxutdurur. Ona görə də sosial sahədə narazılıq günü-gündən artır”.


Müsahibimiz qeyd edib ki, bütün sahələrdə analoji vəziyyətdir. Onun sözlərinə görə, təhsildə, səhiyyədə də vəziyyət bərbaddır:
“Rayonda uşaq doğulub, evə buraxmırlar ki, gedin, 300 manat gətirin, sonra buraxaq. Uşağın anası qızıl üzüyünü lombarda qoyub pul götürür, gətirib bu qaniçənlərə verir. Belə insanların əli kəsilməlidir. Hər idarəyə, hər xəstəxanaya haqq qoyblar. Ona görə də onlar da camaatı soyurlar. Burdan oğurlayıb xaricdə mülklərə sahib olublar. İstanbulu, Ankaranı satın alıblar, Londonda, orda-burda milyonluq mülklər alıblar. Hamı da deyir ki, Prezident hara baxır. Deyən yoxdur ki, Oqtay Əsədov Moskvada kazinonu nəynən açıb? Təhsil Nazirliyi niyə bu günü düşüb, nazir hara baxır?”.

Partiya sədri icra başçılarının özbaşınalıqları ilə bağlı da fikirlərini bölüşüb:
“Prezident son müşavirədə icra başçılarına xəbərdarlıq etdi ki, camaatın problemlərini həll edin, xidmət göstərin. Ancaq bu qədər xəbərdarlıq edilməsinə baxmayaraq, bir rayon icra hakimiyyəti başçısına zəng eləmək, qəbuluna düşmək mümkün deyil. Bütün qəbullar da şəkil çəkdirmək xatirinə təşkil olunur. Heç kimin problemi həll olunmur. Bizim partiyanın qərargahı Binəqədi rayonunda yerləşir. Yüzlərlə şikayətçi gəlib yeni icra başçısından narazılıq edir. Deyirlər ki, başçı gələdən bəri torpaqları qarış-qarış satır, hər yerdən pul yığılır. Özü də deyir ki, guya hansısa fonda pul köçürür. Bu qədər haqsızlıq, özbaşınalıq olmaz axı”.

Sonda H.Hacıyev onu da nəzərə çatdırıb ki, hakim komandadakı xəyanətkar qrup öz istəyinə nail ola bilməyəcək: “Mən imkan vermərəm ki, qardaşımı təkləsindlər. Bu adamlara qarşı sona qədər mübarizə aparacağıq. Əminəm ki, bunların kökünü kəsəcəyik”.