"Belə bir cinayətkarın Azərbaycanda sərgisini keçirmək xalqımıza təhqirdir" - Primakovun sərgisinə ETİRAZLAR

Xəbər verdiyimiz kimi, oktyabrın 29-da Bakı Slavyan Universitetində Rusiyanın ictimai-siyasi xadimi Yevgeni Primakovun 90 illiyinə həsr olunmuş sərgi keçirilib. Bu, Azərbaycan ictimaiyyətində narazılıqla qarşılanıb. Etirazın səbəbi isə Yevgeni Primakovun 20 yanvar facisəsinin təşkilatçılarından biri olmasıdır.

Bununla bağlı Sonxeber.az-a danışan deputat Aqil Abbas bildirib ki, bu sərgini təşkil edənlərdən soruşun görün məqsədləri nədir: "Bu sərginin keçirilməsi mənim üçün çox qaranlıqdır. Ona niyə sərgi keçirirlər? 20 facisənin, Xocalı soyqırımının və ermənilərin bizə qarşı törətdikləri terrorlar barəsində sərgi keçirməlidirlər".

Müasir Müsavat Partiyasının sədri Hafiz Hacıyev qeyd edib ki, bu sərgi haqqında mənim də fikirlərim müsbət deyil:"Yevgeni Primakov qanlı 20 yanvar hadisələrində Azərbaycan xalqının qanına qəltan edib. Belə bir cinayətkarın Azərbaycanda sərgisini keçirmək xalqımıza təhqirdir. Bu çox yersiz bir hərəkətdir. İctimai-siyasi aktivliyin belə bir vaxtında bu cür addım atılması doğru deyil. Xalqımızın təhqir edilməsi deməkdir. Mən bilmirəm bunu kimlər, hansı ağılla edir. Çox təəssüf edirəm ki, ölkənin belə bir durumunda Yevgeni Primakov kimi qatı bir cinayətkarın və əlini Azərbaycan xalqının qanına batıran şəxsin sərgisini keçirmək yersizdir. Bu xalq və Azərbaycan dövləti üçün baş ucalığı gətirməyəcəkdir. Çünki bu çox ağır bir məsələdir. Düşünürəm ki, xalqımız heç bir şeyi unutmur".