Qarabağ Azadlıq Təşkilatının nümayəndələri Avropada görüşlər keçirir - Fotolar

Qarabağ Azadlıq Təşkilatının (QAT) Avropada səfərdə olan təmsilçiləri Akif Nağı və Əkbər Rüstəmov İsveçın Yöteborq və Yönköpinq şəhərlərində görüşlər keçiriblər.

QAT-ın mətbuat xidmətindən GÜNpress.az-a verilən məlumata görə, Yöteborq şəhərində özündə 31 diaspor təşkilatını birləşdirən İsveç-Azərbaycan Federasyonunun sədri Eldar Qaradağlı , tanınmış ictimai xadim, yazar Arif Rəhimoğlu, gənc ictimai xadim Kənan Hacıəkbəroğlu ilə baş tutan görüşdə Qarabağ həqiqətlərinin təbliği yönündə əməkdaşlıq məsələləri müzakirə olunub , yaxın 1 il ərzində birlikdə həyata keçiriləcək tədbirlərlə bağlı ilkin razılaşma əldə olunub.

İsveçdə yaşayan Azərbaycanın Milli Qəhrəmanı Şahin Tağıyevlə də səmimi görüş olub, bir sıra vacib məsələlərə dair müzakirələr aparılıb. QAT-ın yaradıcılarından olan Ş. Tağıyev dəyərli təkliflərini verib.

QAT təmsilçiləri daha sonra Yönköpinq şəhərində vətənpərvər həmyerlimiz, əslən Ağdamın Mərzili kəndindən olan, regional parlamentin deputatı, Sosial-demokrat partiyasının üzvü İradə xanım Əliyeva ilə görüşüb, maraqlı müzakirələr aparıblar. Söhbətin gedişində Qarabağ həqiqətlərinin təbliği, "Qarabağ-Dünya Azərbaycanlılarının milli ideyasıdır" tezisinin həyata keçirilməsi, Qarabağın azadlığı naminə Avropada təşkilatlanmanın genişləndirilməsi və digər məsələlər geniş müzakirə olunub, ilkin razılaşmalar əldə edilib.

QAT təmsilçiləri Yöteborq şəhərində mərkəzi kitabxanaya baş çəkib, apardıqları Qarabağa dair kitabların orada yerləşdirilməsi üçün razılıq əldə ediblər.

QAT təmsilçilərinin Avropa üzrə səfərləri davam edir.