AMAY ticarət mərkəzində yanğın baş verib

Bu gün səhər saatlarında Bakıda “AMAY” ticarət mərkəzində yanğın başlayıb.

APA-nın hadisə yerində olan müxbirinin verdiyi məlumata görə, yanğın Fəhlə prospektində yerləşən ticarət mərkəzinin 4-cü mərtəbəsində baş verib.

Yanğın baş verən zaman ofisdə işçilər olub. Onlar təcili tibbi yardım maşınlarında xəstəxanaya aparıblar.

"Qafqazinfo" saytının xəbərinə görə, ASAN xidmət də AMAY-da fəaliyyət göstərir və yanğın onlardan bir mərtəbə yuxarıda baş verib. ASAN xidmətdən bildirilib ki, onlara ziyan dəyməyib: "İşçilər binadan çıxarılıb və bu gün mərkəz fəaliyyət göstərməyəcək".

Fövqəladə Hallar Nazirliyinin Yanğından Mühafizə Xidmətinin əməkdaşları yanğını söndürüblər.

Trend-in hadisə yerində olan əməkdaşının verdiyi xəbərdə bildirilir ki, ilkin ehtimala görə, yanğın ticarət mərkəzində bağban işləyən şəxsin otağında elektrik naqillərində baş verən qısaqapanmadan baş verib.

Bakı şəhər Təcili və Təxirəsalınmaz Tibbi Yardım Stansiyasından (BŞTTTYS) Trend-ə bildiriblər ki, yanğın zamanı bir nəfərə zəhərlənmə diaqnozu ilə tibbi yardım göstərilib.

APA-nın hadisə yerində olan əməkdaşının verdiyi məlumata görə, yanğının söndürülməsində 4 yanğınsöndürən maşın iştirak edib.