SOS: Bu rayonlardan ət almayın – Nazirlikdən qadağa

Qurban bayramında Ucar, Bərdə və Zərdabdan paytaxta iribuynuzlu mal-qaranın gətirilməsinə qadağan olunub.
Bu barədə AzNews.az-a Dövlət Baytarlıq Xidmətinin (DBX) mətbuat katibi Yolçu Xanvəli məlumat verib.

O, bildirib ki, Qurban bayramı ilə əlaqədar Dövlət Baytarlıq Xidməti gücləndirilmiş iş rejiminə keçib. Yolçu Xanvəlinin sözlərinə görə, artıq bu gündən ət kəsim məntəqələlərində monitorinqlər həyata keçiriləcək. “Bayramla əlaqədar Nodulyar dermatit xəstəliyi riski olan rayonlarda və kəndlərdən paytaxta iribuynuzlu heyvanların gətirilməsinə icazə verilməyəcək. Yəni, bu rayonlardan ət almaq qadağan olunub. Heyvanlar sağlam ərazilərdən gətiriləcək. Bu işə bilavasitə DBX əməkdaşları nəzarət edəcək. Mal-qara yoxlanıldıqdan sonra məntəqələrdə satışına və ya kəsilməsinə razılıq veriləcək. Təbii ki, Nodulyar dermatit xəstəliyinin daha aktiv olduğu Ucar, Bərdə və Zərdabdan eləcə də onun kəndlərindən Bakıya iribuynuzlu heyvanların gətirilməsinə müvəqqəti qadağa qoyulub”.

Qeyd edək ki, bu il Qurban bayramı 4-5 oktyabr tarixlərində qeyd olunacaq.