Hüseynqulu Bağırovun işçisi Bərdə meşələrini talan edir

Bərdə Meşə Mühafizəsi və Bərpası İdarəsinin direktoru Aydın Məmmədov meşə zolaqlarının kənarında tikilən obyektlərə görə xeyli qazanc əldə edir.

Məlumata görə, müəssisə rəhbəri Ekologiya və Təbii Sərvətlər Nazirliyinin ağac əkmə kampaniyasında fəal iştirak etsə də, bu, Aydın Məmmədov tərəfindən gözə pərdə asmaq anlamına gəlir:

"Çünki Aydın Məmmədov həm nazirliyin xətti ilə yol kənarlarına və meşə zolağına ağac əkir, həm də rəhbərlik etdiyi müəsissənin balansında olan meşə zolağında tikilən obyektlərdən hesab alır. Bundan əlavə, müəsissə direktoru tikilən obyektlərin yerində olan ağacların kəsilməsinə görə haqqını alır".

Mənbə qeyd edir ki, idarə müdirinin əsas qazanc mənbəyindən biri də rayon Təhsil Şöbəsi, Mədəniyyət və Turizm Şöbəsinin kəndlərdəki orta məktəblərinə, kitabxanalarına, klublarına, mədəniyyət evlərinə qış aylarında satılan ağac məmulatlarıdır: "Aydın Məmmədov qış aylarında büdcə təşkilatlarına, kəndlərə, fermerlərə ümumilikdə 150 min manatlıq odun satır. Bundan başqa rayonun qaz çəkilməyən kəndlərinə odun satışını da məhz Aydın Məmmədov həyata keçirir".

Məlumatlı şəxsin iddiasına görə, müəsissə müdiri yaxın adamlarının köməyi ilə meşə ərazisində 5 hektarlıq ting və şam ağacları əkərək qonşu rayonlara və Bakı şəhərinə satdırır. Aydın Məmmədovun əsas qazanc yerlərindən biri isə Meşə Mühafizəsi və Bərpası İdarəsinin balansında olan meşə torpaqlarında taxıl, yonca və pambıq əkməsidir. Hazırda idarə müdiri 80 ha taxıl, 35 ha yonca əkib. Həmçinin idarə müdirinin rayon meşəsində çoxlu sayda keçi, qoyun və mal-qara saxlatdırdığı və Kür çayı sahilinə yaxın yerdə balıqçılıq gölünün olduğu bildirilir. Bundan başqa Aydın Məmmədov məcburi köçkünlərin adı ilə bir çox meşə ərazilərini müxtəlif sahibkarlara verəərk onlardan hər il "hesab” alır.

Qeyd edək ki, Bərdə Meşə Mühafizəsi və Bərpa İdarəsinin balansında 8 min hektardan çox ərazi və bunun da 7 min hektarı Kür çayı sahilindəki Tuqay meşələridir. Aydın Məmmədovun məcburi köçkün adı ilə meçə ərazilərini necə və nə cur satdığı, həmçinin müşəbəyilərlə həyata keçirdiyi maxinasiyalarla bağlı növbəti yazılarımızda oxucularımza ilginc məlumat verəcəyik.

Qarşı tərəfin mövqeyini işıqlandırmağa hazırıq.

Azfakt.com