İran Amerikanın yaratdığı koalisiyadan kənarda qaldı

İran İslam Respublikasının rəsmi nümayəndələri ABŞ-ı kəskin tənqid ediblər. ABŞ dövlət katibi Con Kerri Yaxın Şərqə olarkən bəyan edib ki, İran “İraq və Şam İslam Dövləti”nə (İŞİD) qarşı birgə mübarizə aparmaq üçün yaradılmaqda olan beynəlxalq koalisiyaya daxil deyil. Bu barədə “Agence France-Presse” xəbər yayıb.

İran parlamentinin spikeri Əli Laricani deyib ki, Amerikanın Yaxın Şərqdə yeritdiyi siyasət bölgədə islahatlara imkan verməycək, İŞİD-i məhv etmək də Amerikaya müyəssər olmayacaq. Əksinə, Amerikanın bölgədə yeritdiyi siyasət yerli ölkələr arasında qarşılıqlı nifrəti körükləyəcək.

Spikerin sözlərinə görə Amerika Yaxın Şərqdə öz maraqları uğrunda səy göstərir: “Ancaq Amerika başa düşməlidir ki, regionda yaşayan xalqlar artıq qəflət yuxusundan oyanıblar və Amerikanın regiondakı siyasi oyunları dəhşətli nəticələrə gətirib çıxara bilər. Əlbəttə, Amerikanın hava zərbələri ilə İŞİD məhv olmayacaq”.

İranın Milli Təhlükəsizlik Şurasındakı rəhbər şəxslərindən biri olan Əli Şamxani isə deyib ki, Amerika “terrorla mübarizə” adı altında Suriya və İraqın suverinliyini pozur. Əli Şamxani bu fikirləri yerli “İRNA” agentliyinə açıqlamasında söyləyib. Onun fikrincə Amerika Suriyada terrorla mübarizədən daha çox qanuni prezident Bəşər Əsədi devirmək üçün çalışacaq.

Bu günlərdə isə İran Xarici İşlər Nazirliyinin rəsmisi Mərziyə Əfxam ABŞ-ın yaratdığı beynəlxalq koalisiyanı səmimilikdən uzaq olmaqda suçlamışdı.

İranın xarici işlər naziri Mohammad Javad Zarif də ABŞ-ın İŞİD-lə bağlı planına şübhə ilə yanaşıb və bildirib ki, vaxt var idi Amerika Suriyadakı bir çox qruplara yardım edirdi. İndi həmin qrupların çoxu İŞİD-lə bir yerdədir.

Elbəyi Həsənli, Sürix