Əli İnsanov azadlığa çıxdı, mesajlar verdi - Siyasətlə məşğul olacaq
"Azərbaycanı uçurumun dibindən xilas etmək üçün istəyən istənilən qüvvəyə dəstək verməyə hazıram”.
GÜNpress.az xəbər verir ki, bu sözləri keçmiş səhiyyə naziri Əli İnsanov həbsdən azad olunarkən jurnalistlərə deyib.
O vurğulayıb ki, bir neçə dəqiqə əvvəl iqtidarın konslagerlərindən birini tərk edib: "Mənim azadlığa çıxmağımın əsas səbəbi demokratik Qərbin, Amerikanın, onun rəhbərliyinin, Konqresin, Avropanın, AŞPA-nın təşəbbüsü ilə oldu. Düşünürdüm ki, ömrü boyu həbsdə qalacağam. Amma mən faktiki kiçik həbsxanadan böyük həbsxanaya çıxmışam. Mənim minnnətdarlıqla adını çəkdiyim demokratik Qərb və böyük Amerika mənim ayağımdakı qandalları açdı. Çox istərdim ki, xalq da mənim qolumdakı qandalları açsın. Ki, mübarizəmi sondak aparım".
Sabiq nazir deyib ki, o, siyasətdən aralanmayıb, xaricə getmək fikri də yoxdur: "Heç yerə getmək fikirim yoxdur. Burada yaşayacam və siyasi fəaliyyətlə məşğul olacağam”.
İnsanov həyat yoldaşının, qızının yanına gəlməsinə icazə verməməsinə də toxunub: "Bəli, onları yanıma gəlməyə qoymamışam. Yanıma ancaq bir neçə nəfər kişi xeylağı gəlib-gedib. Bilirsiz, burada, həbsxanada belə şeylər düz deyil. Burada gərək Oğru qanunlarına hörmət edəsən".
YAP-çı Maksim Musayevin bir neçə gün əvvəl "Əli İnsanov müxalifətə qoşulmayacaq" açıqlaması barədə suala gəldikdə isə, sabiq nazir belə cavab verib: "Bu, yaxşı sualdır. Hər şey Allahın əlindədir. Hələ məlum deyil, mən onlara qoşulacağam, yoxsa onlar mənə".
İnsanov sonda bildirib ki, tezliklə mətbuat konfransı keçirib, bütün suallara aydınlıq gətirəcək: "Mən heç kəsdən qaçmıram, hamının istənilən vaxt istənilən suallarına cavab verməyə hazıram".
